Provimet e matures 2019 vijnë me ndryshime nga vitet e kaluara, përsa i përket hartimit të tezave të provimeve.

Provimi i gjuhës shqipe dhe letërsisë do të jetë i ndarë tashmë në dy seksione dhe do të shërbejë si një mënyrë për të testuar aftësitë e nxënësit dhe jo aftësitë e tyre memorizuese.

Pavarësisht ndryshimeve në kurrikul, koha në dispozicion për provimin do të jetë po njësoj; 2 orë e 30 minuta. Një ndryshim tjetër ka të bëjë me pikët për vlerësim, ku nga 50 pikë që ishin më parë, këtë vit do të jenë 60.

Drejtoresha e AKP-së, Rezarta Vrapi, shprehet në këtë mënyrë rreth ndryshimeve të reja:

“Ne do të kërkojmë nga maturantët jo memorizim, por me njohuritë që ata kanë çfarë do arrijnë të bëjnë në situate të caktuara që i kemi në teste. Në lidhje me gjuhën shqipe dhe letërsinë testi do të ketë disa ndryshime të diktuara nga kurrikula e re. Pra testi do të jetë i ndarë në dy pjesë, në njërën do të vlerësohen për kompetencat që kanë në gjuhën shqipe dhe në tjetrën për kompetencat në fushën e letërsisë.”

Për sa i përket provimit me zgjedhje, maturantët e maturës së vitit 2019 do të kenë vetëm një provim, ndryshe nga vitet e kaluara që janë aplikuar 2 provime me zgjedhje. Megjithatë, provimi do të jetë shumë më i thelluar se më parë.

“Dhe kjo lëndë me zgjedhje në vetvete do të përmbajë dy lëndë, sepse për shembull nëse marrim kiminë, nuk do jetë vetëm kimia bërthamë por dhe kimia e thelluar”, deklaroi Rezarta Vrapi.

Ne kemi përgatitur materiale përgatitore për provimet e letërsisë dhe matematikës. Për t’u përgatitur për këto dy provime ju lutem klikoni këtu.

Provimet e maturës do t’i serviren mbi 36 mijë maturantëve. Ato do të nisin në datë 7 qershor dhe do të mbyllen përfundimisht më datë 24.