Stafi i PortaliStudentor.al
Ky artikull do t'ju shërbejë për të mësuar më shumë mbi konviktet e mjekësisë dhe specifikat që ka jetesa në këto konvikte. Nëpërmjet këtyre informacioneve ju do të arrini të vendosni nëse do të jetoni në konvikt apo jo.
Mbi kushtet dhe shërbimet e ofruara:
Dhomat janë kryesisht me kapacitet 3 veta,por ka dhe disa me 4 ose 2 persona. Secila prej dhomave ka krevatet me dyshekë, një raft sipër çdo krevati (i mjaftueshëm për mbajtjen e librave dhe disa sendeve personale) dhe një tavolinë me 3 karrige. Vetëm gjysma e dhomave të katit të katërt ka ballkon. Gjithashtu është 1 ballkon më i madh i përbashkët në kat të katërt.
Secili person ka hapësirën e vetë të mbajtjes së rrobave, sa një kanatë dollapi. Secila dhomë ka gjithashtu lavamanin përkatës, por uji është me orar përkatësisht 3 herë në ditë me kohëzgjatje 2 orë.
Bazuar mbi ato që ofrojnë konviktet, këto janë disa gjëra të nevojshme/domosdoshme që studentët duhet ti sigurojnë vetë: Perde
Frigorifer të vogël
Ngrohëse për gatim+pajisjet e kuzhinës
Mbulonjëset e krevateve
Një raft kauçuku për mbajtjen e këpucëve (ose të sendeve të tjera)
Varëse rrobash
Detergjentë për pastrim etj.
Shërbimi sanitar mbulon vetëm korridoret dhe banjot dhe jo dhomën tuaj personale. Secili kat ka nga 2 banjo ku secila prej tyre ka lavamanin dhe ndarjen e tre hapësirave. Kushtet nuk janë fort të mira.
Dushet janë vetëm 3 herë në javë: Të hënë, të mërkurë, të premte në oraret 18:00-21:00. Rradha në dushe është një problem i përbashkët për shumë studentë, sepse janë të gjendura vetëm në kat të parë dhe kanë kapacitet maksimal prej 8 personash.
Lavanderia është në dispozicion nga e hëna deri të shtunën deri pasdite. Duhet të paguash 250 lekë të reja për çdo larje rrobash me kapacitet maksimal 7 kg.
Kati i katërt dhe i dytë ka secili nga një dhomë studimi, modeste nga përmasat. Hyrja/dalja nga konvikti ka një orar të arsyeshëm: nga ora 6 e mëngjesit deri në orën 23:00, kjo sepse më pas dera kryesore kyçet për çështje sigurie. Gjatë kësaj kohe ka dhe një rojë për po të njëjtën arsye.
Për çdo shqetësim mund ti drejtoheni përgjegjëses së konviktit, zyra e së cilës është në kat të parë.
Gjithashtu në kat të parë gjen edhe një makineri me snacks e pije.
